Tibbi tullantılar insan sağlamlığı və ətraf mühit üçün ciddi təhlükə yaradan materiallardır. Bu tullantılar düzgün şəkildə idarə olunmadıqda, yoluxucu xəstəliklərin yayılmasına, zəhərlənmələrə və ekoloji problemlərə səbəb ola bilər. Bu səbəbdən də tibb müəssisələrində şöbələrdən toplanan tibbi tullantıların müvəqqəti saxlanıldığı məntəqə xüsusi standartlara cavab verməlidir.
Məntəqələr necə olmalıdır?
Aşağıda bu məntəqənin necə olması barədə əsas tələbləri təqdim edirik:
- Ayrı və qorunan ərazi olmalıdır
Tibbi tullantıların saxlanıldığı məntəqə ayrı və qorunan ərazidə olmalıdır. Digər bölmələrdən fiziki olaraq ayrılmalı və nəzarətli giriş sistemi ilə qorunmalıdır. Bu, qeyri-ixtisaslaşmış şəxslərin əraziyə daxil olaraq təhlükəli tullantılarla təmasda olmasının qarşısını alır. Tullantıların idarə edilməsinə cavabdeh olan işçilər və tullantıların toplanması üçün avtomobilin asan giriş imkanı olmalıdır. Kənar şəxslərin girişinin qarşısını almaq üçün kilidlənə bilər. Heyvanlar, həşəratlar, gəmiricilər və quşlar üçün əlçatmaz olmalıdır.
Ərzaq mağazaları və yemək yerlərindən uzaqda yerləşməlidir.
- Ventilyasiya və istilik nəzarəti
Saxlanma məntəqəsində normal ventilyasiya sistemi qurulmalıdır. Bu, tullantıların çürüməsindən yaranan pis qoxuların yayılmasının və mikrobların çoxalmasının qarşısını alır.
Məntəqə yaxşı işıqlandırılmalıdır, günəşdən qorunmalıdır. Məntəqənin istiliyi +4°C-dən çox olmamalıdır, xüsusilə patoloji və yoluxucu tullantılar üçün bu temperatur vacibdir.
- Rəng kodu ilə ayrılmış konteynerlər olmalıdır
Tibbi tullantılar rəng kodu ilə ayrılmış konteynerlərdə saxlanmalıdır: Qırmızı – yoluxucu tullantılar
Sarı – patoloji tullantılar
Mavi – kəskin alətlər
Bu konteynerlər sızdırmaz, davamlı və etiketli olmalıdır.
- Daimi təmizlik və dezinfeksiya aparılmalıdır
Məntəqənin döşəməsi möhkəm dayanıqlı, su keçirməz, asan silinən materialdan olmalı və gündəlik təmizlənib dezinfeksiya edilməlidir.
Məntəqə işçilər üçün əlçatan olan, axan kran suyu və sabunu olan yuyucu hövzəyə sahib olmalıdır. Bu, mikrobioloji riskin qarşısını almaq üçün vacibdir.
- Müşahidə və qeydiyyat aparılmalıdır
Tullantıların giriş-çıxış qeydləri dəqiq aparılmalı, hansı tarixdə, hansı növ tullantının gətirildiyi və nə vaxt təhvil verildiyi sənədləşdirilməlidir. Bu, həm nəzarət, həm də hesabatlıq üçün əsasdır.
Sağlamlığınız üçün tibbi tullantıların saxlanma məntəqəsini nəzarətdə saxlayın
Tibbi tullantıların saxlanıldığı məntəqə, beynəlxalq sanitariya normalarına və ekoloji təhlükəsizlik qaydalarına uyğun şəkildə təşkil edilməlidir. Bu sahədə aparılan düzgün yanaşma, həm tibb işçilərinin, həm də cəmiyyətin sağlamlığının qorunmasında mühüm rol oynayır.
